Matës inteligjentë për energjinë elektrike, OSSH hap tenderin 55 mln lekë
OSSH ka shpallur një tender publik 55 milionë lekë për matës inteligjentë në 67 nënstacione.
Operatori i Sistemit të Shpërndarjes (OSSH) ka shpallur një tender publik me fond limit prej afro 55 milionë lekësh për furnizimin dhe instalimin e matësve inteligjentë në 67 nënstacione elektrike në të gjithë vendin. Projekti është pjesë e strategjisë së modernizimit të sistemit të matjes së energjisë elektrike dhe synon përmirësimin e saktësisë, besueshmërisë dhe eficiencës së rrjetit.
Matësit inteligjentë do të jenë të pajisur me teknologji të avancuar, që mundëson:
- Leximin dhe regjistrimin në kohë reale të të dhënave për çdo fider në nënstacione;
- Transmetimin automatik të të dhënave në sistemin AMI (Advanced Metering Infrastructure) të OSSH-së;
- Përmirësim të ndjeshëm të monitorimit, kontrollit operativ dhe reagimit në kohë reale.
Këto pajisje pritet të rrisin ndjeshëm efikasitetin dhe sigurinë e furnizimit me energji elektrike, duke minimizuar humbjet teknike dhe ndërprerjet e panevojshme.
Përveç furnizimit dhe montimit, kontrata përfshin:
- Testimin dhe vënien në punë të matësve;
- Pajisjet duhet të jenë të përputhshme me standardet evropiane të sigurisë, cilësisë dhe mbrojtjes së mjedisit;
- Markimi CE do të jetë kriter i detyrueshëm për vërtetimin e përputhshmërisë me normat teknike.
Matësit inteligjentë do të luajnë një rol kyç në:
- Zëvendësimin e shpejtë të pajisjeve të dëmtuara;
- Reduktimin e kohës së ndërprerjes së energjisë për abonentët e prekur;
- Menaxhimin më të mirë të konsumit dhe ngarkesave në rrjetin e shpërndarjes.
Sipas OSSH-së, furnizimi do të realizohet me teknologjinë më të fundit nga fabrika prodhuese të certifikuara, duke garantuar efikasitet të lartë dhe jetëgjatësi të pajisjeve.
Ky investim është pjesë e përpjekjeve të vazhdueshme për modernizimin e infrastrukturës së shpërndarjes së energjisë elektrike dhe përmirësimin e shërbimit ndaj konsumatorëve finalë. /Scan
